أكتر واحدة حبيتها ..!

بحبك يا أجمل هدية من رب البرية ...
بحبك يالي الجنة تحت أقدامك ...
بحبك يالي ربي وصاني على ارضائك ورسوله حثني على طاعتك ...
بحبك يالي علمتيني إن صلاتي هي حياتي ...
بحبك يالي علمتيني معنى الإيثار وحب الغير ...
بحبك يالي علمتيني إنه لما أحب أضحي ولما أكره أحترم ...
بحبك يالي علمتيني من صغري احترام الذات ...
بحبك يالي علمتيني إن القناعة كنزٌ لا يفنى ...
بحبك يا أكتر شخص حبني في حياتي ...
بحبك يا أكتر شخص بيخاف عليا ...
بحبك يا أكتر شخص بينصحني من قلبه ...
بحبك يا أكتر شخص حسيت معاه بالأمان ...
بحبك يالي همي سبب تعبك الوحيد ...
بحبك يالي لما بترمي في حضنك بنسى أحزاني ...
بحبك يالي كل حلمي إنك تبقي فخورة بيا ...
بحب بسمتك لما ببوس ايديكي أول ما أصحى ...
بحب فرحك لما أنجح ...
بحب إنك عمرك مازعلتي مني مهما غلطت ...
بحبك يالي مهما قولت فيكي مش كفاية عليكي ولا يعبر أي كلام عن الي جوايا ليكي ..
بحبك يالي عرفت في بعدك معنى إني أشتاق لشخص وحياتي تبقى من غيره ولا حاجة ...

" بــــــــحـــــــــــــــبــــــــــــــــــــك   يــــــــــــــــــا   أمـــــــــــــــــــــــــــــــي "

اضحك :)

اضحك عشان ليك رب اسمه الكريم .

اضحك عشان "تبسمك في وجه أخيك صدقة"

اضحك أصل حالك أحسن من ملايين غيرك.

اضحك لو ليك أم بتدعيلك.

اضحك لو حواليك ناس بيحبوك.

اضحك لو ليك أب بيهموا مصلحتك.

اضحك لو ليك صحاب دايماً معاك.

اضحك لو صحتك تمام .

اضحك عشان مفيش حاجة تستاهل الزعل.

اضحك بضحكة ممكن تشد الناس ليك ويحبوك .

اضحك ممكن ضحكتك تفرح حد بيهتم بيك أو بيحبك.

اضحك ومتزودش هموم الي حواليك.

اضحك فسيفتح الله لك باباً كنت تحسبه من شدة اليأس لم يخلق بمفتاح.

اضحك فبعد الليل فجر يرتسم .

اضحك فلعل لك في الغد أفراحٌ لاتعد .

اضحك ممكن أحسن يوم في حياتك لسة مجاشِ.

اضحك ضحكة تخلق في قلبك التفاؤل.

اضحك دي الضحكة تهون أي جراح.

اضحك ضحكة تنهي خلاف وتنهي المشاكل.

اضحك ضحكة تخلي مصيبة بيضة مش سودة.

اضحك دي الضحكة بتعدي.

اضحك والضحكة تبقى ضحكتين.

اضحك ده بيقولوا الضحك بيقوي عضلة القلب أو بيطول العمر ... ((بيقولوا)) !!

باختصار "اضحكلها تضحكلك " :)

Don't let the world change your SMILE , but let your SMILE change the world .

اختار !!

محدش فينا بيختار اسمه , شكله , عيلته , بس مش معناها ان الانسان مالهوش حق يختار . الاختيار مش مجرد شعور بقوة الشخصية أو الثقة , الاختيار انسان ! أيوة انسان واحنا الي بنحدد حياته , كلامه , سلوكه , باختصار انت بالاختيار بتحدد حياة الانسان الي هو في الاخر انت !

الحياة طريق طويل , والاختيار مفترق طرق , بيحدد شكل الطريق الي هتمشي فيه , وكل الطرق فيها مطبات مفيش طريق سهل ومريح بس في طريق في آخره شكل الطريق لي بتتمناه و تحلم بيه , فليه ما تختارش الطريق الي بتحبه , انت مش عاجز عن الاختيار ولا عمرك في يوم ما هتكون كده , انت بس بتثق برأي غيرك أكتر من نفسك , مش معنى كلامي انك ما تستشيرش الناس وتاخد رأي الناس الي بتثق فيهم " فما خاب من استشار " معنى كلامي انك تجمع آراء من الناس بس في الآخر تاخد قرارك بنفسك متخليش حد ياخده بدالك عشان دي في الاخر حياتك انت .

أجمل لعبة حبتها وانا صغير كانت اختياري ليها , كان والدي دايماً بعد كل سنة بيكافئنا انا واخويا بهدية نجاح , ففي سنة انا اخترت لعبة عبارة عن اكثر من 1000 قطعة بحجم الربع جنيه الي كان في يوم مخروم ! بتبني بيهم فيلا كبيرة جداً , ورغم محاولاتهم لاقناعي باني استحالة أعرف أبنيها , إلا اني اصريت اشتريها بس فعلاً ملمستهاش , و أخويا و والدي هم الي بنوها , رغم كده كانت أفضل لعبة جاتلي في حياتي , عشان كانت بسبب الاختيار , الي عايز أوصله بطريق رأس الرجاء الصالح الي مشيته في قصة اللعبة دي , إن الاختيار ممكن يصنع سعادة وفرحة متتنسيش .

" أمي استخسرت المجموع " جملة كفيلة إنها تصنع انسان كاره حياته , و ممكن تضيع مستقبله ! من أجمل القرارات الي خدتها في حياتي دخولي كلية الهندسة رغم الحاح , ناس كتير من أهلي اني أدخل طب أسنان بنفس المبدأ البغيض ده " استخسار المجموع " , المبدأ ده ممكن يبدل حال واحد كان هيدخل كلية وممكن يبدع فيها , إلى مجرد طالب أو موظف تقليدي روتيني ...... " حب ما تعمل حتى تعمل ما تحب " حد يقنعني بالجملة دي ؟ ليه ما اعملش الاتنين , أعمل و أحب !! عبارة حاسس فيها عجز الانسان عن الاختيار ,رغم انه مفيش انسان مش بايده الاختيار . 

ازاي قابلته !!

خلصت ثانوية العامة . وما أدراك ما الثانوية العامة كانت سنة واحدة , بس سنة بنت ..... لذينة جامدة , المهم مرت سنة بحلوها و مرها و سبت الإمارات , بذكرياتي بأصحابي , بحياتي , بكل حاجة حلوة عشتها فيها و جه الوقت اني آجي مصر أدخل الجامعة , بعيداً عن المرمطة الي شوفتها في الثانوية , الاسبوعين بتوع التنسيق اتمرمطت مرمطة ما شافهاش حارس بني عبيد لو لعبوا مع برشلونة , بس " من يشتهي الحسناء لايغله المهر" و المفروض ان الحسناء دي هندسة المنصورة هي فعلا حسناء . بعيداً عن انها سودة شوية و و عجوزة شويتين و تحسها بكرش بس هي مزة (( سامحني يا رب ع الكدب ده )) .أكتر حاجة آلمت قلبي ألم محسوش الراجل الي ورا عمر سليمان من كتر التريقة الي شافها , اني كنت وحيد معنديش صحاااب .. كنت مستعد أصاحب أي حد ان شاء الله بواب الجامعة لغاية  ما كلمت واحد صاحبي من ايام الامارات , وقالي ده فلان معاك في الجامعة , رديت بلهفة : الحقني برقمه .. وكلمته و قابلته في محاضرة ميكانيكا تقريباً أو فيزياء بس ممكن وصفية " احم " ما علينا , قابلني في المحاضرة ذلك الشخص طويل القامة عريض المنكبين تكسوه طبقة من الطين المصري الأصيل , أيوة هو "محمد فتحي" الشهير بـ " ميدو " وبالمناسبة هو الي طلعلي حوار " سمسم " ده !! لأول وهلة تحسه منطوي و خجول , زي بنت متقدملها عريس بس هو في الحقيقة عشري و اجتماعي جداً زي بنت برده بس من شارع الهرم , في البداية كنت بحسني  تقيل عليه , وهو مش طايقني , بس اكتشفت اني كنت غلطان والحمد لله :)) , اتشديتله اوي وحسيته هيبقى صديق وفي مش عارف ليه , كان عامل زي الطغطتيس , الطغنطيس , ابليس . عامل زي البتاع الي بيجذب الحديد ده , أو ممكن أنا الي كان نفسي في اي صديق و السلامة (( أأأأأأه يا دراعي , حبيبي يا فتحي )) لا بجد الي شدني حاجات كتيرة مشتركة , جاي من الامارات , و كمان من نفس المدينة لأ ومن نفس المنطقة , بيننا أصدقاء مشتركين , بس برده مش ده الي بيخلي الصحاب أكتر من اخوات ,, مش هقول الي بيعمل كده المحن و الشدائد بس فعلاً الي بيعمل كده المحن و الشدائد (( رد فعل القارئ : إيييييه !! شفيق استايل )) وده الي خلانا لغاية دلوقتي عمرنا ما زعلنا من بعض ومفيش مرة واحد يخرج من غير التاني .وده باختصار ( هو كده اختصار ) قصة تعرفي على ميدو ,, أنا بقى سمسم ",, محمد سمير  ..