ازاي قابلته !!

خلصت ثانوية العامة . وما أدراك ما الثانوية العامة كانت سنة واحدة , بس سنة بنت ..... لذينة جامدة , المهم مرت سنة بحلوها و مرها و سبت الإمارات , بذكرياتي بأصحابي , بحياتي , بكل حاجة حلوة عشتها فيها و جه الوقت اني آجي مصر أدخل الجامعة , بعيداً عن المرمطة الي شوفتها في الثانوية , الاسبوعين بتوع التنسيق اتمرمطت مرمطة ما شافهاش حارس بني عبيد لو لعبوا مع برشلونة , بس " من يشتهي الحسناء لايغله المهر" و المفروض ان الحسناء دي هندسة المنصورة هي فعلا حسناء . بعيداً عن انها سودة شوية و و عجوزة شويتين و تحسها بكرش بس هي مزة (( سامحني يا رب ع الكدب ده )) .أكتر حاجة آلمت قلبي ألم محسوش الراجل الي ورا عمر سليمان من كتر التريقة الي شافها , اني كنت وحيد معنديش صحاااب .. كنت مستعد أصاحب أي حد ان شاء الله بواب الجامعة لغاية  ما كلمت واحد صاحبي من ايام الامارات , وقالي ده فلان معاك في الجامعة , رديت بلهفة : الحقني برقمه .. وكلمته و قابلته في محاضرة ميكانيكا تقريباً أو فيزياء بس ممكن وصفية " احم " ما علينا , قابلني في المحاضرة ذلك الشخص طويل القامة عريض المنكبين تكسوه طبقة من الطين المصري الأصيل , أيوة هو "محمد فتحي" الشهير بـ " ميدو " وبالمناسبة هو الي طلعلي حوار " سمسم " ده !! لأول وهلة تحسه منطوي و خجول , زي بنت متقدملها عريس بس هو في الحقيقة عشري و اجتماعي جداً زي بنت برده بس من شارع الهرم , في البداية كنت بحسني  تقيل عليه , وهو مش طايقني , بس اكتشفت اني كنت غلطان والحمد لله :)) , اتشديتله اوي وحسيته هيبقى صديق وفي مش عارف ليه , كان عامل زي الطغطتيس , الطغنطيس , ابليس . عامل زي البتاع الي بيجذب الحديد ده , أو ممكن أنا الي كان نفسي في اي صديق و السلامة (( أأأأأأه يا دراعي , حبيبي يا فتحي )) لا بجد الي شدني حاجات كتيرة مشتركة , جاي من الامارات , و كمان من نفس المدينة لأ ومن نفس المنطقة , بيننا أصدقاء مشتركين , بس برده مش ده الي بيخلي الصحاب أكتر من اخوات ,, مش هقول الي بيعمل كده المحن و الشدائد بس فعلاً الي بيعمل كده المحن و الشدائد (( رد فعل القارئ : إيييييه !! شفيق استايل )) وده الي خلانا لغاية دلوقتي عمرنا ما زعلنا من بعض ومفيش مرة واحد يخرج من غير التاني .وده باختصار ( هو كده اختصار ) قصة تعرفي على ميدو ,, أنا بقى سمسم ",, محمد سمير  ..